Archives
Literary

Orte Anay, Kabuyong

Ni: Ismael Fabicon

Maimbong nak paino-ino, nakasahi sa pagrumrom

Katong nagbika-kang mga ampas ruto nipasilong

Sa yanrong it kabatuhan, nopay baga nagsusugong

Amihanon nak panahon, nag-uungon ka paghanrom!

 

Kanidugan nak hinaru-an it aga'g rampog nak bukay

Nagsinadaw ka mga uyan, hupit ka hinan-ay

Panghikro ka takdo, mga paka'y oplingay

Napahuda katong iro, rinuyak kag takay!

 

Uya pailig, mga pasok pasam-ing sa pantaw

Ka bal-ong sa Hipit, mga timba'y pumangyutaw,

Kuyo-kuyo ka uyo, ka byahe'y patakaw-takaw,

Tikapog ka mga bayor, uya't tungon ka patidaw!

 

Mayamig ka panahon, paghiwas sampidaton,

Kaskas it gitara, binasag ka kagab-ihon

Matam-is nak boses, binugtas ka habyon,

Kato yaki'y mga mehi't kambing sa sabsabon!

 

Bayle nak pahupot ka ato ging rak-an

Kalawit nak tuba, sumsuman ay bislar,

Napaparuya sa kahilab sa sinugba nak ipingan,

Ragat nak malinaw sa huna-huna'y imaw't karkar!

 

Ni-o mang buhaton sa rugo it hapon-hapon

Sa Ampongo gihapon ka wislik it ruya-on

Pamusi-ag nak pananamgo naguungot, guhit sa saysayon,

Usang pasi nak bisaya, nagrarayab-rayab mitlangon!